Um Bols - Lëtzebuerg virun de Chamberwalen
Zementindustrie: Ouni CO2 geet et net
Vun allen Industrieberäicher ass d‘Zementindustrie eng vun deenen, déi am meeschten CO2-Emissioune produzéieren. Déi geplangten Dekarboniséierung fir de Klimaschutz stellt och déi Lëtzebuerger d'Zementindustrie virun e groussen Challenge. De Jacques Ganser huet d‘Cimalux-Wierk zu Rëmeleng an Esch besicht.
Reportage: Jacques Ganser
Fotoen a Video: Jo Diseviscourt
An der Karriär zu Rëmeleng, op der lëtzebuergesch-franséischer Grenz, fänkt alles un: Tonnen u Gestengs gi lass gesprengt, Kalleksteen aus ale Koralleriffer gi fräigeluecht, ee Grondmaterial fir d’Zementproduktioun. De Kallekstee gëtt duerno per Fléissband erof an d’Zementwierk transportéiert. An engem risegen Dréiuewen entsteet dann d’Grondmaterial vum Zement.
Mir bauen an der Karriär d’Matière première of: de Kalleksteen an de Mergel.
Christian Rech, Ingenieur bei Cimalux
De Klinker ass och d’Haaptsuergekand vun der Zementindustrie: Fir Klinker ze produzéiere brauch et vill Hëtzt. De Kuelestoff, deen den Uewen hëtzt, gëtt zu engem gudden Deel duerch anert Material ersat: Organesch Offäll, al Pneuen, gedréchente Klärschlamm a Léisungsmëttel. Den Undeel u fossille Brennstoffer kann doduercher reduzéiert ginn.
Fir dat Ganzt mat Stroum ze maachen, do hätt een en enorme Stroumverbrauch.
Myriam Hupperich, Ëmweltbeoptraagt bei Cimalux
De Kalleksteen ass CaCO3. Wann Dir deen ophëtzt, dann hutt Dir CaO plus CO2, an den CO2 geet an d’Atmosphär.
Christian Rech
D’Zementindustrie ass wéinst deem Prozess d’Klima-Suergekand. Ëm déi siwe Prozent vun de globalen CO2-Emissioune ginn op dës Industrie zeréck. Wéinst dem cheemesche Prozess kann dës CO2-Emissioun ne t wierklech reduzéiert ginn, ouni datt den Zement an duerno de Bëtong u Qualitéit verléiert.
ZumZum Deel gëtt probéiert, de Klinkerundeel ze reduzéieren oder ze ersetzen. Cimalux produzéiert dowéinst zanter dem leschte Joer kee Portland-Zement méi, eng Zort, mat ganz héijem Klinker-Undeel. Carbon Capture and storage, also d’Opfänke vum CO2, ass dofir de Wee, deen een an dësem Secteur wëllt goen.
Bei eiser Aktivitéit, wou mir 60 Prozent vun eisen CO2-Emissioune vun eise Rostoffer hierkréien, kënne mir eis net virstellen, wéi dat ouni Carbon capture kéint goen.”
Myriam Hupperich
Well fir dës Prozedur vill Sauerstoff gebraucht gëtt an nei Technologien agesat ginn, wäert och den Investitiounsopwand ganz héich ausfalen.
Et huet virrangeg mat politeschem Wëllen ze dinn.”
Christian Rech
An der Zementindustrie erwaart ee sech also Äntwerte vun der Politik: Iwwer Pipelinë soll den CO2 dann entweder ënner dem Fong vum Mier gespäichert ginn, oder awer aneren Industrien als Matière première déngen. Eent ass awer sécher: bis 2050 muss eng Léisung fonnt ginn.